Кина влезе во зоната за воздушна одбрана на Тајван со 30 авиони, од кои 20 ловци, соопштија тајванските власти. Ова е најголемиот упад од 23 јануари кога 39 авиони влегоа во таканаречената „зона за идентификација“ на воздушната одбрана (АДИЗ) на тој остров, јавува Н1.
Министерството за одбрана на Тајван во понеделникот вечерта објави дека поради упадот на кинеските авиони била алармирана нивната авијација и бил активиран ракетниот систем за противвоздушна одбрана за следење на кинеските активности.
Неколку дена претходно, американскиот претседател Џо Бајден даде ветување дека Вашингтон е подготвен воено да го брани Тајван во случај на кинески напад. Сепак, Белата куќа подоцна нагласи дека нејзината политика на „стратешка двосмисленост“ кон Тајван останува непроменета.
Тајванската зона Адиз е многу поширока од нејзиниот воздушен простор и на некои места се преклопува со истата зона на Кина.
Тајван забележа рекордни 969 кинески воздушни напади минатата година, двојно повеќе од 380 регистрирани во 2020 година. За само еден ден, 4 октомври 2021 година, 56 авиони влегле во воздушната зона на Тајван, а 196 во целиот месец октомври, кој започнува со кинескиот национален празник.
Тајван од почетокот на годината забележал 465 упади во воздушниот простор, што е за речиси 50 отсто повеќе отколку во истиот период минатата година.
