Прелиминарните планови за Меѓународната станица за истражување на Месечината (ILRS), која заеднички ја развиваат Кина и Русија, вклучуваат изградба на нуклеарен реактор на површината на Месечината, покажа презентацијата на кинески вселенски претставник во средата.
Презентацијата ја одржа Пеи Жаоју, главен инженер на кинеската мисија Chang’e-8 планирана за 2028 година и покажа дека енергетскиот систем на идната база, освен на нуклеарна енергија, може да се потпира и на големи соларни панели кои ќе се инсталираат на површината на Месечината.
Мисијата Chang’e-8 претставува клучен чекор во амбициозниот план на Кина за изградба на постојана човечка база на Месечината. Кина, втората по големина економија во светот, планира да стане водечка сила во истражувањето на вселената и да испрати астронаути на Месечината до 2030 година.
Времето на кинеската изградба на станица на јужниот пол на Месечината се совпаѓа со американската програма Артемис, предводена од НАСА и која има за цел да ги врати американските астронаути на Месечината до декември 2025 година.
Академик Ву Веирен од Кинеската академија за инженерство и главен дизајнер на кинеската лунарна програма минатата година изјави дека „основниот модел“ на станицата ILRS, со центар на јужниот пол на Месечината, треба да биде завршен до 2035 година. Лансирањето на лунарната сонда Chang’e ќе го означи почетокот на изградбата на тој основен модел.
Во следните фази, Кина планира да го започне таканаречениот „Проект 555“, кој ќе покани 50 земји, 500 меѓународни научно-истражувачки институции и 5.000 странски научници да се приклучат на иницијативата ILRS.
Овие планови дополнително ги зајакнуваат амбициите на Кина во трката за доминација во вселената, особено во контекст на стратешката конкуренција со САД, која станува се поизразена и на Земјата и пошироко, пишува Ројтерс.
