Кина денеска во Хонг Конг пред меѓународните медиуми го претстави најголемиот патнички авион произведен во земјата, по повод неговиот прв лет надвор од континентална Кина.
Авионот C919 го имаше првиот комерцијален лет во мај, и е симбол на воздухопловните амбиции на Пекинг, кој долго време има намера да се натпреварува со западните конкуренти и да ја намали зависноста од странски технологии.
Елегантниот авион со тесно тело што моментално е изложен на меѓународниот аеродром во Хонг Конг ќе лета над познатото пристаниште во градот во сабота.
Властите се надеваат дека C919, наречен од кинеската државна компанија Comac, може да им парира на Boeing 737 Max и Airbus A320.
Шефот на владата во Хонг Конг, Џон Ли, го поздрави производството на авионите C919 и ARJ21, поранешниот помал модел произведен од компанијата Comac, наведувајќи дека тоа е важна фаза за кинескиот аеронаутички сектор.
„Успешното производство на голем патнички авион ја симболизира лидерската позиција на Кина во транспортната индустрија“, рече Ли на церемонијата на аеродромот.
Повеќе од 30 клиенти нарачале 1.061 авион досега оваа недела, според официјалното соопштение.
Кина инвестираше многу во производството на овој авион и се надева дека ќе им конкурира на западните патнички авиони, иако голем дел од деловите што се користат за неговото производство доаѓаат од странство.
Развојот на авионот започна во 2008 година, но официјално одобрение за лет доби дури минатата година.
Повеќе од 60.000 патници беа превезени со два авиони Ц919 кои оперираат меѓу кинеските градови Шангај и Ченгду.
Денеска во леталото можеа да влезат новинари и други лица поканети на церемонијата, а во наредните два дена ќе можат да влезат и локални претставници.
Властите денеска истакнаа дека напредниот аеродинамичен дизајн, модерниот систем на потисок и современите материјали на авионот овозможуваат намалување на јаглеродниот отпечаток и подобрување на енергетските перформанси на авионот.
Авионот C919 може да има помеѓу 158 и 192 седишта, во зависност од конфигурацијата.
За европскиот Ербас и американскиот Боинг, Азија, а особено Кина се приоритетни цели, а компаниите се обидуваат да ја искористат растечката побарувачка за летови кои доаѓаат од значителна средна класа.
Ербас во април објави дека ќе го удвои својот производствен капацитет во Кина и потпиша договор за изградба на втора фабрика за склопување на А320 во Тијанџин, на североистокот на земјата.
Првата локација за склопување во Тијанџин беше отворена во 2008 година и произведува четири А320 месечно, а Ербас се надева дека ќе го зголеми за 50 отсто до крајот на 2023 година.
