Директорката на американската тајна служба Кимберли Читл денеска поднесе оставка по критиките дека нејзината агенција не успеала да спречи обид за убистви на поранешниот претседател Доналд Трамп на предизборниот митинг во Пенсилванија овој месец, објавија американските медиуми.
Читл вчера беше сослушана пред Комисијата за надзор на Претставничкиот дом за постапките на Тајната служба пред атентатот на Трамп на 13 јули во градот Батлер.
На тоа сослушување, Читл одби да поднесе оставка, велејќи дека таа е најквалификуваната личност да ја предводи Тајната служба, која е одговорна за заштита на претседателот, потпретседателите, нивните семејства и водечките претседателски кандидати.
Во изјавата, претседателот Џо Бајден рече дека тој и првата дама Џил Бајден се „благодарни“ за децениската јавна служба на Читл.
– Како лидер, потребна е чест, храброст и неверојатен интегритет да се преземе целосна одговорност за организација која има една од најпредизвикувачките работни места во јавниот сервис – рече Бајден за Читл.
Бајден рече дека наскоро ќе биде именуван нов шеф на Тајната служба.
Пратениците беа особено лути по појавувањето на Читл пред Надзорната одбор на Претставничкиот дом во понеделникот, каде таа одби да одговори на многу прашања на комисијата.
За време на нејзиниот настап пред Надзорниот одбор, Читл призна дека имало „значајни“ проблеми со безбедноста на митингот, но сепак ги отфрли повиците за нејзина оставка.
– Мислам дека сум најдобрата личност за водење на Тајната служба во овој момент – рече Читл во понеделникот.
