Украинските војници првпат се судрија со севернокорејските војници во руската погранична област Курск, откри во вторникот украинскиот министер за одбрана Рустем Умеров. Претседателот на Украина Володимир Зеленски истакна дека првите судири со Северна Кореја отвораат ново поглавје на нестабилност во светот.
Во интервју за јужнокорејската радио и телевизија КБС, Рустем Умеров рече дека украинските сили нападнале мала група севернокорејски војници во руската погранична област Курск, каде што има база на украинската армија. Тој не спомна дали во судирите имало жртви. Тој исто така рече дека очекува значителен број севернокорејски единици да се приклучат во битката, пренесува британски Би-Би-Си.
Според министерот, мнозинството севернокорејски војници се уште се обучуваат во областа. „Тие носат руски униформи, поминуваат тактичка обука и се распоредени под различни команди на руската армија на линијата на фронтот“, рече тој. Според него, на бојното поле најверојатно ќе бидат распоредени пет единици, секоја со околу 3.000 војници.
Володимир Зеленски, кој претходно го осуди несоодветниот одговор на Западот на стационирањето на севернокорејски трупи во Русија, нагласи дека првите судири со Северна Кореја отвораат ново поглавје на нестабилност во светот. Тој рече дека има околу 11.000 севернокорејски војници во областа Курск.
Во исто време, во видео обраќање тој ја повика Украина да направи се, заедно со светот, за овој руски чекор за проширување на војната да стане неуспех и за Москва и за Пјонгјанг.
Разузнавачки извори од Јужна Кореја, САД и НАТО претходно го потврдија распоредувањето на севернокорејски војници во Русија.
