Високи воени претставници во Киев тврдат дека Украина им нанесува големи загуби на руските сили на јужниот фронт во обид да ја врати територијата во близина на Бахмут. Но, нема потврда за значителен пробив во контраофанзивата, пренесува Ројтерс.
Генералштабот на вооружените сили на Украина објави дека украинските сили го зазеле селото Андриевка, село јужно од Бахмут, во делумно окупираната област Доњецк и дека собориле 17 беспилотни летала лансирани кон Украина од страна на Русија.
Во соопштението на Фејсбук , генералштабот за битката околу Бахмут рече:
„Во насока кон Бахмут, непријателот не се откажува од обидот да ја пробие одбраната на вооружените сили на Украина во областа Бохданивка. За возврат, одбранбените сили на Украина при офанзивните дејства имаа делумен успех во областа Клишчиивка“.
Извештајот исто така вели:
„Во последните 24 часа имаше 25 борбени судири. Непријателот истрела 2 проектили и 59 воздушни напади, изврши 56 гранатирања и врз позициите на нашите војници и врз цивилните објекти на нашата земја. Исто така, вчера напаѓачите ја нападнаа Украина и употребија 22 камикази беспилотни летала Шахед-136/131, од кои 17 беа уништени од украинската противвоздушна одбрана“.
Напредокот на Украина е многу побавен од минатата година, кога Киев ја поврати територијата на североисток, а украинскиот претседател Володимир Зеленски и другите официјални претставници ги отфрлаат западните критики дека тримесечната офанзива е премногу бавна и попречена од стратешки грешки како што е погрешното распоредување на војниците.
Руското Министерство за одбрана соопшти дека руските сили одбиле осум напади во области јужно од Бахмут.
Украинската заменик-министерка за одбрана Хана Маљар изјави дека украинските сили зазеле три села јужно од Бахмут, вклучително и Андриевка.
„Таму е постигнат напредок“, објави Маљар на Телеграм.
Руските сили го зазедоа Бахмут во мај по неколкумесечни борби кои го оставија градот во урнатини. Оттогаш, украинските сили ги напаѓаат руските позиции, особено јужно од Бахмут.
