Принцезата од Велс го одржа својот прв деловен состанок од почетокот на лекувањето од рак на почетокот на оваа година.
Кејт Мидлтон имала состанок во вторникот во замокот Виндзор, а се работело за нејзиниот проект од раното детство, пишува Би-Би-Си.
Оваа деловна средба уследи по минатонеделната видеопорака во која Кетрин изјавила дека и е олеснето што нејзината хемотерапија е завршена.
Принцезата исто така рече дека оваа година била „неверојатно тешка“, но дека повторно „чувствува дека има надеж“.
Лекарите се уште внимаваат на нејзиното здравје. Во видеото таа изјавила дека нејзиниот „пат до заздравување и целосно закрепнување е долг и мора да го продолжи секој изминат ден“.
Нејзиното одење на состанок во близина на нејзиниот дом во Виндзор, забележано во официјален документ, укажува на продолжување на тој напредок.
Други детали за средбата нема, но познато е дека еден од водечките проекти во кои таа учествуваше беше кампањата Shaping Us која се однесува на подигање на свеста за важноста на раното детство.
Кејт тој проект го нарече нејзино најважно животно дело.
Ова пробно враќање на работа следеше по една година здравствени проблеми со кои таа се справуваше.
Во јануари таа беше во болница на операција на абдоменот, а потоа во март беше откриено дека се лекува од рак.
Оттогаш, таа имаше неколку јавни настапи, на Trooping the Color и тенискиот турнир Вимблдон, но една година главно беше надвор од очите на јавноста.
Минатонеделното многу лично видео, снимено со нејзиното семејство во Норфолк, го прикажува нејзиното емотивно патување низ повеќемесечно лекување на ракот. Пораката е дека „од темнината може да излезе светлина“.
Принцезата ги опишала бурните настани од нејзиното искуство со ракот и дека се чувствувала „комплексно, страшно и непредвидливо“.
