Инспекциските служби на Агенцијата за храна и ветеринарство спроведоа вонреден инспекциски надзор во Зоолошката градина во Скопје, откако Министерството за внатрешни работи (МВР) и медиумите објавија дека таму нелегално се заклани десеттина коњи, чие месо се користело за исхрана на дивите животни. Со контролата, утврдено е дека во кланицата со комора во Зоолошката градина, која не е одобрена од Агенцијата за храна и ветеринарство, заклани се десет копитари, без соодветна документација, односно со непознат здравствен статус, неидентификувани и нерегистрирани и без соодветен документ за движење.
Во склоп на кланичниот објект најдени се мрши од закланите животни во вкупна количина од 1.286 килограми. Агенцијата за храна и ветеринарство издаде Решение и нареди нештетно уништување на небезбедното месо на депонијата Дрисла.
За сторените прекршоци, против Зоолошката градина и одговорното лице во него, Агенцијата за храна и ветеринарство ќе изрече соодветни казни согласно Законот за ветеринарно јавно здравство, Законот за безбедност на храна, Законот за заштита и благосостојба на животните и Законот за идентификација и регистрација на животните.
