Државната компанија „Номагас“ објави тендер за избор на изведувач на градежни работи за изградба на гасовод за интерконекција помеѓу Македонија и Грција. Проценетата вредност на градежните работи без ДДВ изнесува 83,6 милиони евра, а постапката е отворена.
Според тендерот, компанијата која ќе биде избрана ќе треба да го заврши гасоводот во должина од 67 километри за 3 години. Крајниот рок за прием на понудите е 20 ноември.
Постапката за избор на изведувач на работите може да трае најмалку 3 месеци. Претходно Министерството за енергетика најави дека изградбата ќе почне напролет, а ќе треба да се забрза нејзиното завршување.
Ова е втор тендер за изградба на гасоводот. Првиот кој беше распишан лани во ноември беше неуспешен, бидејќи кредиторот Европската банка даде техничка забелешка во тендерот. На тендерот се јавија 5 компании од кои 4 странски конзорциуми и една домашна компанија.
Гасоводот што ќе ги поврзува Солун и Неготино е со должина од 123 километри и треба да обезбеди второ поврзување на земјава со гас од Грција кој нема да има руско потекло. Планирано е почетниот капацитет да биде 1,5 милијарди кубни метри годишно, со можност за проширување до 3 милијарди кубни метри годишно. Гасоводот покрај транспорт на гас треба да има можност и за транспорт на водород.
Нашиот дел од гасоводот кој треба да ја поврзе границата со Грција и Неготино е со должина од 67 километри. Првично цената на изградбата на овој дел од гасоводот беше проценета на 57 милиони евра, но подоцна таа достигна 83 милиони евра, а парите се обезбедени од меѓународните финансиски институции, од кои 28,9 милиони евра се кредит од Европската инвестициска банка, 16,5 милиони евра од Европската банка за обнова и развој и 12,425 милиони евра од ВБИФ инвестициски грант и од останати кредитори.
Интерконекторот за природен гас меѓу Македонија и Грција се најавува од 2016 година како еден од најзначајните енергетски објекти кој треба да овозможи диверзификација на снабдувањето со гас и беше предвидено да виде завршен во првата половина на 2025 година.
Атина и Скопје потпишаа договор во септември 2021 година во Солун, во присуство на американскиот амбасадор, што ја нагласи геополитичката важност на проектот, но сè уште не е почната неговата изградба во земјава.
На овој гасовод се надеваат и Србија и Косово кои исто така најавија конекција со македонскиот гасовод кој ќе снабдува со гас и водород преку Грција.
