Британскиот министер за надворешни работи Дејвид Камерон оваа недела ќе ги посети Јордан и Египет за да се заложи за одржлив прекин на огнот и хуманитарни прекини во Појасот Газа, каде што израелските напади убија повеќе од 19.600 Палестинци и раселеа голем дел од населението, јавува Anadolu.
За време на неговата втора посета на регионот, Камерон ќе отпатува во двете земји заедно со секретарот за Блискиот Исток Лорд Ахмад, се вели во соопштението на британското Министерство за надворешни работи во средата.
Шефот на дипломатијата ќе разговара за итната потреба од „одржлив прекин на огнот“ кој вклучува ослободување на затворениците и прекин на ракетниот напад врз Израел.
„Никој не сака овој конфликт да трае ни миг подолго отколку што е потребно. Но, за да функционира прекинот на огнот, тој мора да биде одржлив“, рече Камерон, кој во вторникот беше во Париз и Рим.
Овие изјави доаѓаат по неодамнешната промена во политиката на Владата на ОК, која претходно одби да упати каков било повик за прекин на огнот, повторувајќи дека Израел има „право да се брани“.
Премиерот Риши Сунак претходно изјави дека е потребен „одржлив прекин на огнот“ во Газа бидејќи „премногу животи се изгубени“ под израелското бомбардирање.
Во израелските воздушни и копнени напади врз Појасот Газа по нападот на Хамас на 7 октомври загинаа најмалку 19.667 Палестинци, главно жени и деца, а 52.586 беа повредени.
Војната го остави Појасот Газа во урнатини, со половина од станбениот фонд на крајбрежната територија оштетен или уништен, а околу два милиони луѓе се раселени во густо населената енклава.
Се верува дека околу 1.200 Израелци биле убиени во нападот на Хамас.
