Денеска нѐ напушти голем фудбалер и тренер. Денеска нѐ напушти Синиша Михајловиќ, кој зад своето име остави блескава кариера.
Србинот остави длабоки траги секаде каде што играше, а особено голема беше неговата љубов кон Црвена ѕвезда.
Интересен момент се случи во 2002 година кога неговиот тогашен клуб Лацио ја извлече Црвена ѕвезда за противник во второто коло од УЕФА натпреварувањето, но токму поради големата љубов кон црвено-белите, Михајловиќ направи потег кој денес малкумина би имале храброст да го направат.
Синиша, тогаш, заедно со колегата Дејан Станковиќ, одлучи да не настапи против својот омилен клуб и со тоа двајцата предизвикаа големо внимание во медиумите, особено поради тоа што раководството на Лацио не смееше ништо да им каже. Цврсто го зазедоа својот став дека нема да играат против Ѕвезда и двата натпревари ги отседоа на клупата за резервни играчи.
Натпреварите ги доби италијанскиот тим и Лацио помина во следната фаза, а Михајловиќ тогаш даде интересна изјава за медиумите:
– Понатаму оди послабиот тим. Црвена ѕвезда беше подобра и во Рим и во Белград, но пресуди поголемото искуство на фудбалерите на Лацио – изјави тогаш Миха.
Уште еден необичен потег беше тоа што Михајловиќ тогаш излезе на „Маракана“ облечен во дресот на Црвена ѕвезда.
За жал, популарниот Миха никогаш не доби можност да се врати во Црвена ѕвезда и таму да ја заврши играчката кариера, а неостварена желба му остана и тоа да биде тренер на клубот од Маракана.
