Популарен чеченски пејач за кој долго време се веруваше дека бил убиен како дел од „геј-чистката“ во руската република, бил мачен и егзекутиран по наредба на Рамзан Кадиров откако чеченскиот лидер „лично се уверил“ за неговата сексуална ориентација, се тврди во нов извештај.
Зелимхан Бакаев (25) живеел во Москва и стекнал популарност надвор од регионот на Северен Кавказ, каде исчезнал во август 2017 година откако се вратил дома за да присуствува на свадбата на неговата сестра. Групите за човекови права алармираа поради неговото исчезнување, предупредувајќи дека тој најверојатно е цел на тековната „геј-чистката“ во претежно муслиманскиот регион, пишува Дејли Бист.
„Бакаев бил следен од службата за безбедност за да се открие дали е геј“
Чеченските власти тврдат дека тој побегнал во Европа, додека Кадиров, понекогаш наречен „војник на Путин“ поради неговата силна поддршка за рускиот претседател, сугерираше дека Бакаев бил убиен од членови на семејството кои се срамеле од неговата сексуална ориентација.
Сега „NC SOS Crisis Group“, организација за човекови права која и помага на ЛГБТИК+ заедницата во Северен Кавказ, објави дека Бакаев бил следен од чеченската служба за безбедност со задача да утврди дали е геј или не. Неименуван извор близок до Кадиров опиша како чеченскиот лидер, откако дознал за сексуалната ориентација на Бакаев, тоа го сфатил како „лична навреда“, бидејќи тој и младиот пејач претходно се ракувале и заедно се фотографирале. Тој одговори со наредба на своите безбедносни сили да се „справат“ со Бакаев, пишува во извештајот.
„На семејството му рекоа да го закопаат Бакаев како куче“
Бакаев, наводно, бил мачен пред да биде убиен. Телото е предадено на неговото семејство, на кое властите им рекле „да го закопаат како куче“, велат од „NC SOS Crisis Group“.
Исчезнувањето на Бакаев и, како што се претпоставува, неговото убиство, го привлекоа светското внимание и ја повика Русија да истражи што се случило со него, а поради зголемениот притисок на јавноста, чеченската државна телевизија посочи на две очигледно изведени видеа на „YouTube“ како доказ дека тој е жив и здрав и е во Германија.
Бизарниот говор на Кадиров: „Тој е суштество“
Неколку месеци подоцна, во јануари 2018 година, Кадиров, во бизарен говор, се појави да потврди дека Бакаев е мртов и понуди детален опис на неговото убиство, тврдејќи дека тоа го извршило семејството на пејачот.
– Неговите роднини, кои не се грижеа за него и кои се срамеа што е еден од нив, сега велат дека Кадиров го зел – се обрати чеченскиот лидер пред униформираните безбедносни сили, додавајќи дека „нема докази“ за вмешаност на државата.
– Му рекоа да дојде, а кога стигна, очигледно се соочил со блиски или подалечни роднини и му рекле: „Ти си геј“. Тие знаеја што прави нивниот братучед. Нема ли никој во селото, никој во семејството што може да признае дека го направил тоа? Тие многу добро знаат кој им бил роднина – изјави Кадиров пред да го нарече Бакаев, „суштество“.
Таткото на Зелимхан: „Никој од роднините не ставил прст врз него“
Хусеин Бакаев, таткото на Зелимхан, ги негираше тврдењата на Кадиров.
– Ниту еден од неговите роднини не го допре со прст и немало причина да се стави прст на него – изјави тој за „RFE/RL“ во Русија.
