Јапонците ќе треба да ги исклучат своите непотребни светла во домовите три часа по 15 часот по јапонско време, ако ги слушаат препораките на својата влада. Јапонското министерство за економија, трговија и индустрија очекува побарувачката на струја да биде многу висока, а снабдувањето ќе биде тешко бидејќи земјата се соочува со топлотен бран, пишува Б92.
Јапонските власти со недели предупредуваат на можен прекин на електричната енергија поради зголемените температури. И покрај тоа што снабдувачите со електрична енергија работат на зголемување на испораките, Министерството соопшти дека ситуацијата е непредвидлива бидејќи температурите растат.
Снабдувањето со електрична енергија на Јапонија е отежнато откако земјотресот во североисточниот дел на земјата во март принуди некои нуклеарни централи да се затворат. Официјалните лица, исто така, затворија неколку застарени фабрики за фосилни горива во обид да ги намалат емисиите на јаглерод диоксид.
Овие проблеми, заедно со зголемената побарувачка за електрична енергија, доведоа до недостиг на електрична енергија. На почетокот на овој месец, јапонската влада ги повика домаќинствата и компаниите да заштедат што е можно повеќе електрична енергија во текот на летната сезона од јули до септември.
За време на викендот, јапонскиот град Исесаки, 85 километри северозападно од Токио, ја забележа највисоката температура измерена во Јапонија во јуни.
Јапонскиот јавен сервис NHK извести дека вчера 46 лица се префрлени во болница во Токио поради сомнение за топлотен удар и дека постои можност 94-годишен маж да починал од топлотен удар во близина на Токио, пренесува Танјуг.
