Јапонскиот премиер Фумио Кишида и претседателката на Претставничкиот дом на САД Ненси Пелоси се сретнаа во петокот во Токио за да ја потврдат својата посветеност на блиска соработка за одржување на мирот во регионот, додека тензиите во Тајванскиот теснец продолжуваат да растат, пишува dpa.
Во четвртокот, Кинеската Народноослободителна армија истрела пет проектили во ексклузивната економска зона на Јапонија од територијалното море на Тајван.
Однесувањето на Кина имаше „сериозни импликации за мирот и стабилноста во регионот и меѓународната заедница“, рече Кишида, а пренесуваат западните медиуми.
Пелоси, третиот највисоко рангиран американски функционер, пристигна во Токио во четвртокот вечерта на крајот на азиската турнеја која вклучуваше и посети на Сингапур, Малезија, Тајван и Јужна Кореја.
Посетата на Тајван ги зголеми тензиите меѓу САД и Кина бидејќи Кина го смета Тајван за дел од Кина.
Кинеската војска оваа недела одржува големи воздушни и поморски вежби во водите околу Тајван.
Најголемата воена демонстрација на сила на Кина во последните децении очигледно има за цел да го одврати Тајван од преземање понатамошни чекори кон независност.
Јапонија се воздржа од заземање официјален став за посетата на Пелоси на Тајван и наместо тоа се залагаше за мирно решавање на тајванското прашање преку дијалог.
