Јаневска: Барам одговорност од МОН за случајот со работните листови за учениците во кои хетеросексуалноста се споредува со ментално пореметување
Ова лудило кое во образованието го продуцираат државните институции ги премина сите граници, реагираше Весна Јаневска, претседателка на Комисијата за образование на ВМРО-ДПМНЕ, откако во јавноста изби скандалот со работните листови за средношколци во кои хетеросексуалноста се споредува со ментално пореметување.
„Зборувам за работни листови за учениците по предметот Образование за животни вештини. Во овие работни листови некој комплетно малоумен прашува: Ако хетеросексуалноста е нормална, тогаш зошто толку многу хетеросексуалци се лица со ментални нарушувања? Најголемиот број лица што злоставуваат деца се хетеросексуалци. Дали сметате дека е безбедно вашето дете да го праќате на училиште каде повеќето наставници се хетеросексуалци? Ја повикувам целата стручна јавност, психолози, педагози, социолози ВЕДНАШ, ИТНО, НЕОДЛОЖНО, да се оградат и да реагираат на грубата манипулација на малолетните деца, пропагандата и навредите кон мнозинската сексуална ориентација. Ова не е неписменост и незнаење, за ова има основ и за одговорност“, напиша Јаневска.
Поради вакви работи, додава таа, расте бројот на хомофоби во општеството.
„И никој да не се осудил да ми припише хомофобија, не сум јас хомофоб, ама заради ова што се прави има сѐ повеќе хомофоби. Чукнете си ја главата, видете што правите. Малолетни деца се во прашање. Шаќири, ти ова го одобри? БРО што правите? Има ли психолози во БРО? Не знам што има, а што нема, ама за злоупотреба на деца одговорност ќе има“, напиша Јаневска.
