Израелската војска соопшти дека нејзините војници напредувале во копнената офанзива во градот Кан Јунис во јужниот дел на Појасот Газа, додека воздушните сили извршиле напади врз десетици цели на Хамас.
Како што се наведува, двајца оперативци на Хамас излегле од тунелот и пукале во единицата Дувдеван, која возвратила и го уништила влезот на тој воен објект.
Во северниот дел на Газа, ИД, во бегалскиот камп Џабалија, ја презеде контролата врз главниот пункт на Хамас во областа, убивајќи неколку оперативци.
Израелската морнарица продолжи да им помага на копнените сили со напади и гранатирање цели на Хамас долж брегот.
Во меѓувреме, во градот Сдерот и други места во пограничната област се огласија сирени за предупредување за проектили.
Нема извештаи за повредени или материјална штета.
Израелската копнена офанзива принуди десетици илјади Палестинци да побегнат на крајниот југ од малата енклава и ги спречи хуманитарните организации да доставуваат вода, храна и лекови, според АП.
Во Кан Јунис, истите жестоки урбани борби и бомбардирање се интензивираа како и претходните недели во градот Газа и на северот на палестинската територија.
Меѓутоа, на југ, областите во кои Палестинците можат да се засолнат се намалуваат сè побрзо.
Израел апелираше до жителите да го евакуираат Кан Јунис, каде што се вели дека живеат двајца високи лидери на Хамас.
Повеќето од жителите на градот, сепак, останаа заедно со раселените Палестинци од северот на Газа и не можат да одат на катастрофално пренаселениот југ.
