Најмалку четири лица загинаа, а 24 се ранети во израелските напади врз јужните предградија на Бејрут во близина на болницата Харири во понеделникот вечерта, соопшти либанското Министерство за здравство. Портпаролот на израелската армија Даниел Хагари претходно најави дополнителни напади врз финансиската структура на Хезболах, пренесоа странските агенции.
Според Даниел Хагари, под споменатата болница во Бејрут бил откриен подземен магацин во кој имало милиони долари во готовина и злато. Тој рече дека болницата нема да биде бомбардирана и ги повика либанските власти „да не дозволат Хезболах да ги користи парите за терор и да го нападне Израел“.
„Нема да ја нападнеме болницата. Сакам да нагласам: ние не војуваме со народот на Либан, ние сме во војна со Хезболах“, рече Хагари.
Директорот на болницата Фади Аламех ги отфрли обвинувањата и во интервју за либанската телевизија изјави дека болницата ќе биде евакуирана како мерка на претпазливост. Тој инсистираше на тоа дека болницата не е поврзана со Хезболах и ја повика либанската армија и властите да го истражат тоа.
Хагари предупреди и дека Хезболах се финансира преку компании во Турција, како и во Сирија и Јемен, пренесе германската новинска агенција dpa.
Израелската војска во понеделникот соопшти дека нападнала околу 300 цели на Хезболах во Либан за 24 часа, откако ја прошири својата офанзива против проиранската група со напади врз нејзиниот финансиски систем.
Хезболах со ракети ги нападна Хаифа и Тел Авив
Либанското шиитско движење Хезболах истрела неколку ракети врз Израел, кои, според него, биле насочени кон воени згради во Хаифа и Тел Авив. Хезболах истрела околу 12 ракети со среден дострел. Неколку минути подоцна во Тел Авив се огласија сирените кои предупредуваа за ракетен напад, а во областа беше прогласена вонредна состојба, а воздушниот сообраќај на меѓународниот аеродром Бен Гурион беше ограничен.
Според Ал Џезира, неколку експлозии се слушнале во предградијата на Тел Авив, но инаку нема извештаи за успешноста на споменатите напади.
Израел продолжува да ја спречува испораката на итна хуманитарна помош во северниот дел на Газа, предупреди во понеделникот шефот на Агенцијата на ОН за помош и работа на палестинските бегалци (УНРВА) Филип Лазарини. „Хуманитарните агенции, вклучително и УНРВА, мора да добијат пристап до северот на Газа“, напиша Лазарини на мрежата Х, опишувајќи ги ужасните услови во овој дел од опустошената енклава.
Покрај општиот недостиг, Лазарини предупреди и дека болниците без струја не можат да се грижат за жителите таму. Засолништата на агенцијата на ОН се преполни, а според сведоштвата од северот, многумина кои се обидуваат да избегаат се убиени, додаде тој. Поради опасноста нивните тела остануваат на улица, а спречени се и спасувачки мисии од под урнатините.
