Израел со воени авиони нападна аеродром во северозападна Сирија, кој служи како главна влезна точка за испорака на помош по земјотресот во февруари. Приемот на хуманитарна помош на тој начин ќе биде пренасочен кон аеродромите во Дамаск и Латакија.
Израелски воени авиони ноќе го нападнаа аеродромот во Алепо во северозападна Сирија и предизвикаа значителна штета, соопшти сириското Министерство за одбрана.
„Точно во 2:07 часот по локално време, израелскиот непријател изврши воздушен напад од Средоземното Море западно од Латакија, гаѓајќи го меѓународниот аеродром во Алепо“, соопшти сириското Министерство за одбрана, додавајќи дека властите го затвориле аеродромот за сите летови. Се уште нема информации за жртви.
Аеродромот во Алепо инаку е главната влезна точка за авионите кои доставуваа помош во областа во последниот месец по разорниот земјотрес што на 6 февруари ги погоди југоисточна Турција и северозападна Сирија. Оттогаш, повеќе од 80 летови со хуманитарна помош слетаа во Алепо, изјави Сулејман Калил, портпарол на сириското Министерство за транспорт. Тие летови сега се прекинати до понатамошно известување.
Сè додека не се санира штетата, веќе не е можно да се примаат летови со хуманитарна помош“, рече тој, објаснувајќи дека пистата не била во функција поради нападот. Како што соопшти Министерството за транспорт, хуманитарните летови се пренасочени на аеродромите во Дамаск и Латакија.
Израелската армија се уште не го коментираше нападот. Ова беше втор израелски напад на територијата контролирана од сириската влада, откако претходно споменатиот разорен земјотрес ја потресе областа. Претходно, израелските сили извршија ракетен напад врз Дамаск на 19 февруари, при што загинаа најмалку 15 луѓе. Се наведува дека цел на нападот биле ирански милиции и членови на шиитското милитантно движење Хезболах.
Војната во Сирија однесе речиси половина милион животи од почетокот на 2011 година, а околу половина од населението е принудено да ги напушти своите домови. Дистрибуирани се повеќе од шест милиони.
