Турција не учествуваше во операцијата на вооружената опозиција во Сирија што доведе до пад на режимот на Башар ал Асад, изјави турскиот министер за надворешни работи, Хакан Фидан.
– Турција не беше дел од таков процес. По почетокот на операцијата од страна на Хајат Тахрир ал-Шам и на другите опозициски групи, вложивме интензивни напори таа да биде спроведена на најбескрвен начин и без проблеми. Пред ова не сме се обединиле со ниедна земја или група, ниту, пак, сме учествувале во планирање таква операција – рече Фидан.
Според него, немало средба меѓу него или други турски претставници со поранешниот сириски претседател Асад, со цел да се разговара за нормализација на односите меѓу Анкара и Дамаск, иако такви обиди неколкупати биле правени со посредство на трети земји.
Фидан истакна и дека Израел никогаш не сакал Асад да се повлече од функцијата.
– Генерално, Асад беше корисен играч за Израел – рече турскиот министер за надворешни работи.
