Израелската армија соопшти дека пронашла тела на тројца заложници за време на операција во Џабалија на северот од Појасот Газа. Министерството во Газа предупредува дека наскоро ќе мора да ја затворат болницата Ал Акса.
Израелската армија денеска соопшти дека пронашла тела на тројца заложници во Џабалија.
Станува збор за 42-годишен Израелец и 32-годишен државјанин на Мексико и Франција, кои беа киднапирани на музички фестивал од членови на палестинското исламистичко движење Хамас на 7 октомври минатата година кога го нападнаа Израел.
Третата жртва е 59-годишен жител на Сдерот, кој е двоен државјанин на Бразил и Израел и се води како исчезнат по нападот на Хамас, јавува француската новинска агенција АФП.
Ал Акса остана без струја
Министерството за здравство на Газа во четвртокот предупреди дека Ал Акса, најголемата болница во централната палестинска енклава, наскоро би можела да биде затворена поради недостиг на електрична енергија, откако израелскиот воен напад во Рафах сериозно го ограничи протокот на гориво за генераторите. Наведоа дека болницата треба да престане со работа во рок од два часа, пренесува онлајн порталот Франс 24.
Подоцнежните видеа објавени од Асошиетед прес ја покажуваат болницата во темнина. Според Министерството, во болницата се лекуваат над 600 пациенти и повредени, а од нејзината работа зависат околу 650 пациенти кои одат на дијализа на бубрезите. Според телевизијата Ал Џезира, нејзиниот директор предупредил дека без струја сите пациенти ќе бидат осудени на смрт.
Според Обединетите нации, загубата на болницата Ал Акса ќе остави Деир ал Бала со само две болници во време кога градот е поплавен од Палестинци кои бегаат од Рафах на југот на енклавата. Во цела Газа, само една третина од првичните 36 болници сè уште функционираат, а дури и тогаш само делумно.
Според Ал Џезира, ситуацијата се влошува и во болниците на северот на Појасот Газа, особено во болницата Камал Адван, која ноќе беше гранатирана од израелската армија и во болницата Ал Авда.
