Италија објави дека е подготвена да ги евакуира со авион своите граѓани кои сакаат да го напуштат Нигер, по минатонеделниот пуч.
Германија денеска им препорача на своите граѓани во Нигер да ја прифатат понудата на Франција да ги евакуираат со авиони изнајмени за превоз на француски државјани.
Италијанскиот министер за надворешни работи Антонио Тајани на социјалната мрежа „Х“ (до неодамна Твитер) напиша дека италијанската влада одлучила на своите граѓани во Ниамеј да им понуди можност да го напуштат градот со специјален лет за Италија.
Тој рече дека италијанската амбасада во Ниамеј ќе работи да придонесе во тековните операции за посредување.
Италијанското Министерство соопшти дека не станува збор за „евакуација“ туку за специјален лет за оние кои сакаат да ја напуштат земјата.
Во главниот град на Нигер има околу 90 Италијанци, а во целата земја вкупно 500, од кои повеќето се војници.
Германското Министерство за надворешни работи соопшти дека има помалку од 100 германски државјани кои не работат ниту во Амбасадата ниту во Армијата. Шефот на германската дипломатија Аналена Бербок изјави дека германската амбасада во Нијамеј ќе продолжи да работи.
Со државен удар предводен од генералот Абдурахман Тијани минатата недела беше соборен избраниот претседател Мохамед Базум.
Интересите на Франција, поранешна колонијална сила во регионот која го поддржува претседателот Базум, се чини дека се главната цел на војниците кои го соборија претседателот.
