Мажите кои пијат 15 или повеќе алкохолни пијалоци неделно и жените кои пијат осум или повеќе чаши алкохол во истиот период имаат поголеми шанси да заболат од кардиоваскуларни болести, според новата студија спроведена од Американскиот колеџ за кардиологија, пренесува Science Daily. .
Според извештајот, мажите од оваа група имаат 33 отсто поголеми шанси да се разболат во споредба со оние кои пијат умерено – три до 14 пијалоци неделно, додека жените имаат дури 45 отсто поголеми шанси да добијат срцеви заболувања во споредба со оние кои консумираат три до седум алкохолни пијалоци неделно.
„Постои широко распространето верување меѓу жените дека тие не се изложени на ризик од срцеви проблеми додека не наполнат многу години, но оваа студија покажува дека оние кои пијат големи количини алкохол се изложени на постојан ризик, без оглед на нивната возраст“, вели еден од учесници во проектот, кардиологот Џамал Рана. Тој додава дека резултатите од студијата се изненадувачки бидејќи укажуваат на тоа дека жените се изложени на опасностите од алкохолот во многу поголема мера отколку што се мислеше.
Резултатите од истражувањето, во кое беа анализирани повеќе од 400.000 мажи и жени склони кон пиење алкохол во текот на четири години, укажуваат на зголемување на опасностите од алкохолот, особено кај помладите луѓе. Исто така, добиените податоци предупредуваат дека конзумирањето алкохол, како и неконтролираното пиење, е значително зголемено кај жените во споредба со претходните децении.
Научниците веруваат дека прекумерното консумирање алкохол директно влијае на зголемувањето на нивото на маснотии во крвта, што во комбинација со зголемениот пулс го забрзува процесот на затнување на артериите.
Во текот на долги серии на години, според медицинските експерти, алкохолот влијае на издолжувањето, зголемувањето и слабеењето на срцевиот мускул, што го прави срцето помалку ефикасно да пумпа крв и значително се зголемува ризикот од кардиоваскуларни заболувања.
Според податоците на СЗО, прекумерното консумирање алкохол може да биде причина за повеќе од 200 различни болести, вклучувајќи болести на црниот дроб, некои форми на рак и туберкулоза.
Податоците покажуваат дека околу еден процент од светската популација страда од алкохолизам и дека проблемите поврзани со прекумерната потрошувачка во светот се најизразени во Русија и Австралија.
