Според една неодамна објавена студија, недостатокот на сексуален интерес кај мажите може да укажува на зголемен ризик од рана смрт. Научниците веруваат дека намалениот сексуален нагон може да укаже на некои скриени здравствени проблеми, пишува Science Alert.
Јапонските експерти ги анализирале податоците од годишните здравствени прегледи на 20.969 жители (8.558 мажи и 12.411 жени) на возраст од 40 или повеќе години од префектурата Јамагата, планински регион во Јапонија познат по своите топли извори, храмови и природни убавини, пишува ScienceAlert, цитиран од Index.
Научниците од Универзитетот Јамагата ги разгледале нивоата на сексуален интерес што самите ги пријавиле испитаниците во првичниот прашалник и во последователната анкета спроведена години подоцна. Од првичните 20.969 учесници, 503 оттогаш починале.
„Ова е прва студија која ја испитува врската помеѓу сексуалниот интерес и ризикот од смрт“
Експертите забележале дека смртноста од рак и други причини е значително повисока кај мажите со намалено либидо. Оваа корелација се одржа дури и кога ги земаа предвид факторите како што се возраста, хипертензијата, дијабетесот, пушењето, консумирањето алкохол, образованието, брачниот статус и менталното здравје.
„Иако е познато дека сексуалната активност и задоволството придонесуваат за психолошкото здравје кај постарите групи луѓе, врската помеѓу сексуалниот интерес и долговечноста досега не е истражена. Ова е прва студија која ја испитува врската помеѓу сексуалниот интерес и ризикот од смрт“, наведуваат истражувачите во истражувањето.
Студијата покажа дека жените пријавуваат недостаток на сексуален интерес почесто од мажите, но не е забележана значајна корелација помеѓу пониското либидо и смртноста. Бидејќи се работи за набљудувачка студија, не може да се заклучи кој од факторите е причина, а кој последица. Научниците наведуваат дека недостатокот на сексуален интерес кај мажите може да биде поврзан со нездравиот начин на живот.
„Исто така, ако претпоставиме дека сексуалниот интерес е поврзан со позитивни психолошки фактори, неговото отсуство може да влијае на голем број воспалителни, невроендокрини и имунолошки реакции. Потребни се дополнителни истражувања за да се разбере што точно се случува, но ова откритие на потенцијална врска е исто така важен чекор“, додаваат тие.
Проблематично прашање во прашалникот
Треба да се напомене дека ова истражување има одредени ограничувања. На пример, нивото на либидото беше одредено според прашањето: „Дали моментално чувствувате некаков интерес за луѓе од спротивниот пол?“. Дури и ако претпоставиме дека сите испитаници разбрале на што се однесува прашањето, тоа ги исклучило учесниците со хомосексуални тенденции.
„Секоја личност која одговорила „не“ се дефинира како личност без сексуален интерес. Според тоа, сексуалниот интерес за некој од ист пол би се сметал за „недостиг на сексуален интерес“ во оваа студија“, предупредуваат авторите на студијата и наведуваат дека овој проблем треба да се земе предвид во идните истражувања.
И покрај ограничувањата на студијата, научниците веруваат дека во Јапонија треба да се подигне нивото на свесност за сексуалниот интерес како јавно здравствен фактор кај постарата популација.
„Канадската влада, преку материјали за промоција на јавното здравје, почна да ја поддржува сексуалната активност како еден од елементите на програмата „здраво стареење“. Во Јапонија има повеќе предрасуди за сексот кај постарите отколку во западниот свет. Се надеваме дека нашето откритие ќе помогне да се промовира сексуалното здравје во Јапонија“, напишале авторите на студијата.
Истражувањето наречено Асоцијација помеѓу недостатокот на сексуален интерес и смртноста од сите причини кај јапонската општа популација: проспективната опсервациска студија Јамагата беше објавена во списанието PLOS One.
