Источниот украински град Бахмут, во центарот на неколкумесечната борба, кој е под притисок на руската војска и руската паравоена група Вагнер, би можел да „падне во следните денови“, предупреди денеска генералниот секретар на НАТО Јенс Столтенберг.
– Не можеме да исклучиме дека Бахмут на крајот ќе падне во наредните денови – рече Столтенберг на маргините на состанокот на европските министри за одбрана во Стокхолм.
Бахмут е жариште на неколкумесечните интензивни борби меѓу Украина и Русија, која се обидува да ја преземе контролата врз областа.
Шефот на руската паравоена група Вагнер денеска изјави дека неговите војници го зазеле „целиот источен дел“ на Бахмут, центарот на борбите во источна Украина. Според Москва, заземањето на градот ќе овозможи „нови офанзивни операции во длабочина“ на Украина.
Украинскиот претседател Володимир Зеленски изјави синоќа во интервју за Си-Ен-Ен дека неговите воени сили се решени да го задржат тој град и дека падот на градот ќе остави „отворен пат“ за Русите кон другите градови во источна Украина.
Шефот на НАТО ја минимизираше стратешката важност на веќе уништениот град Донбас, кој Русија вети дека ќе го освои и покрај големите загуби.
– Ова неизбежно не значи некаков пресврт во војната, но укажува дека не треба да ја потценуваме Русија. Треба да продолжиме да ја поддржуваме Украина – изјави Столтенберг за новинарите.
Министрите за одбрана на земјите на ЕУ денеска изнесоа план за испорака на проектили и муниција во Украина. Столтенберг синоќа, во пресрет на состанокот на министрите за одбрана на ЕУ во Шведска, ја истакна потребата од дополнителна воена помош за Украина.
– Беше разговарано за итната потреба за зголемување и одржување на поддршката, изјави Столтенберг по разговорите со шведскиот премиер Улф Кристерсон во Стокхолм.
Според него, сега е важно да се зголеми производството на оружје и муниција.
Столтенберг го поздрави фактот што се работи на заедничка набавка на муниција од страна на земјите од Европската Унија.
