Во автобусот на граничниот премин Брод, босанско-херцеговската полиција идентификувала 5-годишно девојче од Германија, жртва на меѓународна трговија со луѓе, соопшти Обвинителството на БиХ.
„Обвинителот од Одделот за шверц и трговија со луѓе на Обвинителството на БиХ ги координираше активностите во соработка со Службата за работи со странци на БиХ и Граничната полиција на БиХ, кои при контрола на стоки и патници на редовните автобуски линии на граничниот премин Брод, открија и идентификуваа жртва на меѓународна трговија со луѓе“ – соопштија од Обвинителството на БиХ.
Девојчето патувало со редовна автобуска линија во придружба на странски државјанин. Тој по налог на обвинител е приведен во Службата за странци на Босна и Херцеговина, а девојчето е сместено во безбедна куќа.
„Споменатото девојче се наоѓа во базата на лица по кои трагаат меѓународните институции, а обвинителот е во постојана комуникација со надлежното обвинителство и полицијата во Визбаден, Германија. Се преземаат активности за враќање на детето кај нејзината мајка“ – велат од Обвинителство.
