Иранскиот премиер Масуд Пазешкијан за време на неговата прва посета на Ирак денеска ја осуди политиката на Западот, велејќи дека Израел „врши масакри во војната во Газа користејќи оружје што им го дале САД и Европската унија“. Посетата на Пезешкијан е значајна за двете земји.
Пезешкијан се надева дека ќе ги зајакне врските на Техеран со Багдад, бидејќи регионалните тензии се повеќе ги вовлекуваат двете земји со мнозинство шиити во поширок конфликт на Блискиот Исток.
За Иран, неговиот однос со Ирак останува клучен од економски, политички и верски причини, особено откако американската инвазија на Ирак во 2003 година го собори диктаторот Садам Хусеин, кој водеше крвава, долгогодишна војна против Иран во 1980-тите.
Ирак се обидува да воспостави рамнотежа помеѓу Техеран, кој поддржува различни шиитски милиции во земјата, и САД, кои имаат 2.500 војници стационирани во Ирак.
Ирачкиот премиер Мохамед Шија ал Судани на заедничката прес-конференција со Пезешкијан изјави дека денеска двете земји потпишаа 14 меморандуми за разбирање за подобрување на односите. Тој исто така вети дека ирачкиот воздушен простор нема да се користи за напади врз Иран, што очигледно се однесува на Израел.
Пезешкијан ќе ги посети и шиитските светилишта во ирачките свети градови Карбала и Наџаф, како и изградбата на железничката пруга што го поврзува јужниот град Басра со Иран и Ирбил, главниот град на полуавтономниот северен курдски регион во Ирак.
Сепак, постојат тензии меѓу двете земји, особено откако иранските проектили погодија локации во Ирак во нападите во текот на изминатите шест години, насочени кон курдските милиции, база во која се сместени американските сили и, како што тврди Техеран, израелски локации во Ирак.
Ирак, исто така, има потреба од блиски врски со Иран за да го одржи снабдувањето со ирански природен гас.
Континуираното присуство на американски војници во Ирак продолжува да го загрижува Иран. Откако изби војната меѓу Израел и Хамас, ирачките милиции во сојуз со Иран ги нападнаа американските сили, што доведе до американски воздушни напади врз нив. Ирачките политичари продолжуваат да дебатираат дали да го поддржат престојот на американските трупи во земјата.
