Советот на Европската унија и Европскиот парламент денеска постигнаа прелиминарен договор за мерките за намалување на емисијата на метан, кој е втор по големина гас по јаглерод диоксидот со штетен ефект на стаклена градина што ги промовира климатските промени и го загадува воздухот.
Договорот вклучува нови обврски за нафтената и гасната и индустријата за јаглен редовно да известуваат и потврдуваат емисии на метан, како и мерки за спречување на таквите емисии, вклучително и мерки за спречување на истекување на метан.
Предвидени се мерки за транспарентност за емисијата на нафта, гас и јаглен кои се увезуваат во ЕУ, како и конкретни рокови за мониторинг и независни инспекции на потенцијалните испуштачи на метан.
Метанот придонесува за глобалното затоплување и загадувањето на воздухот. Во ЕУ, енергетскиот сектор е одговорен за 19 отсто од емисиите на метан.
Во декември 2022 година, членките на ЕУ постигнаа договор за предлог за намалување на тие штетни емисии, а за негово прифаќање беше потребно зелено светло од парламентот.
Мерките се дел од пакетот „Подготвени за 55“, кој има за цел да ги намали емисиите на стакленички гасови во ЕУ за најмалку 55 проценти до 2030 година.
Меѓу штетните гасови кои ја уништуваат животната средина, на прво место е CO2, а потоа метанот, азот диоксидот и флуорираните јаглеводороди или таканаречените F-гасови.
Меѓутоа, за разлика од CO2, метанот има посилно дејство – апсорбира повеќе топлина така што влијае на глобалното затоплување за 30 проценти, а во период од 20 години неговиот штетен потенцијал за ефектот на стаклена градина е 84 пати поголем од ефектот на CO2.
На глобално ниво, 60 отсто од емисиите на метан се предизвикани од човековата активност, а првото место го зазема земјоделството, а потоа енергетскиот сектор, отпадот и согорувањето на биомасата.
