Стапката на инфлација во Хрватска, мерена преку потрошувачките цени, се лизна на 3,3 отсто во мај, од 3,7 отсто еден месец претходно, покажува првата проценка на Државниот завод за статистика (ДЗС), објавена во петокот.
Цените на стоките и услугите за лична потрошувачка, мерени преку индексот на потрошувачките цени, во мај, во однос на истиот месец лани, се зголемени во просек за 3,3 отсто, додека во однос на април се зголемени во просек за 0,1 отсто.
По неколку месеци постепен пад, инфлацијата во март годинава стагнираше на 4,1 отсто на годишна основа. Но, од април, кога падна на 3,7 отсто, инфлацијата повторно е на надолна траекторија.
Гледано според главните компоненти на индексот, цените на услугите во мај се зголемени на годишно ниво за 6,1 отсто, а на храната, пијалаците и тутунот за 3,2 отсто. Енергенсите поскапеа за 1,9 отсто, а индустриските непрехранбени производи за 1,5 отсто.
На месечно ниво, цените на услугите во мај пораснале за 0,5 отсто, а на индустриските непрехранбени производи и храната, пијалаците и тутунот за 0,2 отсто. Цените на енергенсите, пак, паднаа за 1,2 отсто.
Конечните податоци за индексот на потрошувачките цени во мај, според класификацијата ECOICOP, ќе бидат објавени на 17 јуни.
Инфлацијата со ХИЦП се лизна на 4,3 отсто
Според хармонизираниот индекс на потрошувачките цени (ХИЦП), објавен во петокот од Евростат, проценетата годишна стапка на инфлација во Хрватска во мај се лизна на 4,3 отсто, од 4,7 отсто еден месец порано.
Тоа е втора највисока стапка на инфлација во еврозоната по Белгија, каде што изнесуваше 4,9 отсто.
Просечната годишна стапка на инфлација во еврозоната во мај порасна на 2,6 отсто, од 2,4 отсто еден месец претходно.
