Индонезиската агенција за храна и лекови соопшти дека ги суспендирала лиценците на уште две локални фармацевтски компании кои произведуваат течни лекови како сируп, додека властите ја истражуваат смртта на речиси 200 деца од акутна бубрежна повреда.
Директорката на Агенцијата Пени Лукито изјави дека компаниите „Самко Фарма“ и „Ќуброс Фарма“ користеле високо ниво на етилен гликол и диетилен гликол во своите производи, па им било наложено да ги повлечат спорните производи од пазарот и да ги уништат преостанатите залихи.
Таа истакна дека властите го истражуваат синџирот на снабдување со суровини и го следат процесот за да разберат како прекумерната количина на сомнителни состојки навлегла во производите.
„Долга е дистрибутивната линија до фармацевтската индустрија – од увозници до одредени дистрибутери на хемиски производи и големи трговци на мало“, додаде Лукито.
Минатиот месец Индонезија привремено ја забрани продажбата на одредени видови течни лекови, откако во производите беше откриено присуство на етилен гликол и диетилен гликол, кои се можни фактори за предизвикување на болеста.
Овие две состојки се користат во производството на антифриз и течност за сопирачките, но и како поевтина алтернатива во одредени фармацевтски производи на растворот од глицерин или средството за згуснување во многу сирупи за кашлица. Тие можат да бидат токсични и да доведат до акутно оштетување на бубрезите.
Агенцијата на почетокот на неделата ги суспендираше лиценците за уште три компании кои во своите производи имаа високо ниво на етилен гликол и диетилен гликол.
Индонезија ги истражува смртните случаи во соработка со Светската здравствена организација по сличен инцидент во Гамбија, каде што беа регистрирани најмалку 70 смртни случаи по консумирање сируп за кашлица од индиската компанија Maiden Pharmaceuticals.
