Новоизбраниот американски претседател Доналд Трамп изјави дека по прогласувањето на победата на изборите не разговарал со рускиот претседател Владимир Путин, но кажа оти „мисли дека ќе зборуваат“.
Трамп во интервју за Ен-Би-Си-Њуз изјави дека од средата, кога прогласи победа на претседателските избори во САД, разговарал со 70 светски лидери.
Претходно вчера, Путин му честиташе на Трамп за неговиот избор за претседател, велејќи дека нема ништо против да го обнови контактот со него.
Путин на настан во градот Сочи рече дека новоизбраниот шеф на Белата куќа покажал голема храброст по обидот за атентат претходно оваа година.
На прашањето дали Mосква би разговарала со Трамп Путин рече „спремни сме“.
Кремљ денеска соопшти дека Путин е подготвен да разговара за Украина со Трамп, но дека тоа не значи оти Путин е подготвен да се откаже од неговите барања.
