САД и Велика Британија синоќа погодиле 36 цели на 13 локации на Хутите во Јемен, во вториот ден од големите операции на САД против групите поврзани со Иран по смртоносниот напад врз американските војници минатиот викенд.
Нападите ги погодија затрупаните складишта за оружје на Хутите, ракетните системи и лансери што ги користеа Хутите за напади врз бродови во Црвеното Море и беа насочени кон 13 локации низ целата земја, соопшти Пентагон.
Американскиот секретар за одбрана, Лојд Остин рече дека нападите имале поддршка и од Австралија, Бахреин, Канада, Данска, Холандија и Нов Зеланд.
„Оваа колективна акција испраќа јасна порака до Хутите дека тие ќе продолжат да трпат понатамошни последици доколку не ги прекинат нивните нелегални напади врз меѓународните бродови и поморските бродови. Нема да се двоумиме да ги одбраниме животите и слободниот проток на трговија во еден од најкритичните водни патишта во светот“, се вели во соопштението на Остин.
Во петокот, Соединетите Држави извршија напади во Ирак и Сирија врз повеќе од 85 цели поврзани со иранскиот корпус на гардата на исламската револуција и милициите што ги поддржува, при што наводно загинале речиси 40 луѓе.
Нападите, кои ги осудија Иран и Ирак, беа одмазда за нападот со беспилотно летало во кој загинаа тројца американски војници и беа ранети повеќе од 40 американски војници во Јордан минатата недела.
Јеменската бунтовничка група Хути денеска објави дека ќе одговори на американските и британските воздушни напади врз нивните позиции во Јемен и дека овие напади нема да ги „одвратат“.
Портпаролот на Хутите, бригадниот генерал Јахја Саре, изјави дека во изминатите неколку часа американски и британски бомбардери извршиле 48 напади, од кои 14 врз главниот град Сана, девет врз Ходеида и 11 врз Таиз.
Според „Тајмс оф Израел“, тие области се под контрола на таа бунтовничка група, која е поддржана од Техеран.
– Нападите нема да не одвратат од поддршката на палестинскиот народ во Појасот Газа и нема да останат неказнето – предупреди Саре.
Хутите речиси секојдневно вршат ракетни или беспилотни напади врз комерцијални и воени бродови кои минуваат низ Црвеното Море и Аденскиот Залив, како што велат, како поддршка на палестинската милитантна група Хамас во нејзината војна против Израел.
Последните напади врз Хутите уследија по американските воздушни напади во петокот врз цели во Сирија и Ирак како одговор на нападот со беспилотно летало врз американската воена база во Јордан минатата недела, во кој загинаа тројца војници.
Погодените локации, наводно, припаѓале на различни милиции поддржани од Иран, кои САД ги обвинуваат за нападот во Јордан.
Иран, сепак, го отфрла тврдењето на Вашингтон дека Техеран е поврзан со нападот со беспилотни летала.
