Во последно време фудбалската експанзија во Саудиска Арабија е во полн ек, можеби многу побрзо отколку што мислиме. Бројните ѕвезди, неограничените финансиски средства и домаќинството на Светското првенство ја поттикнаа оваа земја да се развива понатаму во фудбалот, а ние го имаме совршениот соговорник да разговараме на оваа тема…
Динко Јеличиќ, хрватскиот тренер и актуелен стратег на клупата на Горица, до неодамна беше тренер на саудискиот Ал Наср, клубот со кој започна фудбалската екстаза во таа земја со доаѓањето на големиот Португалец – Кристијано Роналдо.
Каков човек е Роналдо, што мислат Саудијците за Марсело Брозовиќ и дали нивната фудбалска експанзија е оправдана? Одговори на овие и многу други прашања даде гостин на Спорт клубот.
Пред Горица го водевте саудискиот Ал Наср, како на крајот отидовте таму?
„Претходно веќе работев во Саудиска Арабија, поминав и две години во Кувајт, бев во Иран, па веќе бев запознаен со тој дел од светот. Веќе имав некои контакти во Саудиска Арабија, една година пред моето доаѓање во Ал Наср ме повикаа за директор на младинската школа, но во тој момент не можевме да се договориме. По една година ме повика Горан Вучевиќ, кој во меѓувреме ја зазеде позицијата директор во Ал Наср и ми се јави по барање на претседателот со кој претходно имав контакт. Така започна приказната, се договоривме јас да ја преземам таа функција, а се друго е историја…“
Какви се вашите впечатоци од тие земји, односно колку сериозно го сфаќаат фудбалот во споредба со Европа?
„Многу сериозно, особено во Саудиска Арабија. Тие станаа одлична фудбалска нација, особено сега кога инвестираат огромни ресурси за дополнително да го подигнат квалитетот на фудбалот на сите нивоа. Навистина многу брзо напредуваат, можеби се уште заостануваат зад Европа во некои работи, првенствено по лиги, системи, а се уште ги немаат целосно организирано помладите категории. Во Европа се игра на нивоа од седум до 19 години, додека кај помладите селекции имаат само четири натпреварувачки категории. Но, сето тоа се сегменти за кои веќе имаат јасен развоен план и сигурен сум дека наскоро ќе ги подобрат. Во Саудиска Арабија има многу талентирани млади играчи, па со неограничен буџет – кој е дефинитивно присутен – тие дефинитивно ќе напредуваат уште повеќе и уште побрзо за неколку години“.
Значи, вие верувате во саудиска фудбалска експанзија?
„Секако, со оглед на тоа што бев дел од таа приказна. Видов колку се инвестира во структурата, носат многу квалитетни странски тренери, а Федерацијата всушност ја водат Европејци. Бев присутен на нивните семинари каде што ги презентираа своите стратегии и тоа добро функционира, особено сега кога го добија и домаќинот на Светското првенство, што беше голем дел од нивниот план“.
„Роналдо е поинаков отколку на ТВ“
Имавте чест таму да го водите големиот Кристијано Роналдо. Какво е чувството да го имате, според многумина, најдобриот фудбалер во историјата во вашиот тим?
„Тоа секако беше привилегија, беше големо задоволство за мене. Перцепцијата на таков играч однадвор, гледајќи исклучиво низ медиумската призма, е нешто сосема поинакво во споредба со ситуацијата кога директно работите со него и на некој начин го водите. Моето искуство со него е многу позитивно. Тоа беше само потврда на она што сите веќе го знаеме… Каков професионалец е, колку сериозно пристапува на секој детал, но и од човечка страна, ми остави многу добар впечаток – тоа е она што особено позитивно ме изненади. Овие човечки квалитети се нешто што реално не може да се види преку медиумите, тој е одличен на личен план, социјално е многу пристапен и е постојана поддршка за сите во средината во која работи“.
Дали е тешко, или воопшто е можно да се воспостави тренерски авторитет над личност како Роналдо?
“Така мислам. Тоа се луѓе кои имаат огромно ниво на конкурентност и вложуваат многу во текот на животот во својот напредок за да го достигнат нивото на кое тој можел да го достигне. Свесен е колку е важен тренингот, но и човекот кој раководи со целиот тренажен процес. Роналдо преку комуникација стигнува до сегментите кои се важни за тимот. Зборуваме за периодот кога беше целосно подготвен да се потчини на тимот до крај за заеднички да постигнеме резултати. Потоа автоматски става еден вид шлаг на тортата со својата доминација во форма на голови, секогаш ја има таа глад за голови. Што се однесува до авторитетот и комуникацијата, никогаш навистина не сум имал проблем со него, иако знам дека имало такви ситуации и порано. Не знам зошто тоа се случи, но за мојата соработка со него би му дал оценка „плус пет“.
Додека сè уште зборуваме за Роналдо, дали имаш некоја внатрешна информација, до кога планира да игра и дали планира некогаш да престане?
„Разговаравме во неколку наврати и никогаш конкретно не ми кажа кога планира да игра. Овде потпиша договор на две години, но сигурен сум дека ќе игра уште една или две години потоа ако неговата здравствена состојба е добра. Роналдо сè уште има огромна желба и ужива во тоа што го прави, дури и кога го гледате на тренинг. Тој не е од оние кои се појавуваат заради ред и доаѓаат само да соберат пари. Со оглед на тоа како изгледа и работи, верувам дека има уште најмалку две години во него по истекот на актуелниот договор“.
Имам впечаток дека по неговото пристигнување во Ал Наср, поголемиот дел од јавноста мислеше дека тој ја прифатил понудата исклучиво заради пари, но брзо се сфати дека тоа не е така. Дали се согласуваш?
„Тој сигурно не дојде само за пари. Нивото на конкурентност што го има во себе не му го дозволува тоа. Со неговото доаѓање ја подигна целата саудиска лига на повисоко ниво и автоматски го започна тој домино-ефект на големи трансфери со него и тоа секако ќе продолжи. Мислам дека луѓето навистина немаат перцепција за квалитетот на таа лига, тоа не е баш несериозно првенство. Посебно сега нивото на фудбалот е покачено, но и пред доаѓањето на Роналдо беше многу квалитетен, со оглед на тоа што секој клуб има можност да донесе по осум странци во тимот, па претходно имаше доста квалитетни играчи. Сега почнаа да пристигнуваат мега-ѕвездите, но и помладите фудбалери. Во таква лига треба да си на крајно сериозно ниво за да постоиш и да се бориш за нешто, а Роналдо дојде да се бори за трофеи“.
Марсело Брозовиќ дојде во Ал Наср во летниот преоден рок. Дали можеби ве контактирал како сонародник кој веќе имал можност да работи таму?
„Не се слушнавме, но и по моето заминување многу хрватски тренери останаа во Ал Наср, додека Горан Вучевиќ беше на директорската позиција, па ги контактираше. Само што се одминавме затоа што моето и неговото заминување се преклопија. Сепак, отидов во Саудиска Арабија да се договорам, бидејќи планиравме да ја продолжиме соработката, но се отвори место во Горица, па дојдов да се договорам и да ја заклучам приказната на човечки начин, што беше случај. Тие реагираа фантастично во приказната за моето заминување, а што се однесува до Брозовиќ, видов колку е енормно популарен, луѓето во Саудиска Арабија навистина го сакаат. Од сите засилувања го издвоија како играч кој најмногу им донесе и најмногу го ценат од сите играчи кои дојдоа таму“.
