Ако често имате главоболки, сигурно знаете дека одредени видови храна и пијалоци можат да ги влошат. Сепак, иако е важно да знаеме што треба да избегнуваме, пожелно е да знаеме и која храна помага во лекувањето на главоболката.
„Храната навистина е лек“, рече Вин Браун, директор за интегративна медицина во здравствениот центар Вејк Форест Баптист во Винстон-Салем.
„Кога се обидувате да ја контролирате мигрената, она што го јадете – и кога јадете – може да направи голема разлика“, изјави таа за Everyday Health, како што пренесува Вечерњи лист.
„Да се биде отворен за промени во исхраната е добар почеток“, вели д-р Браун и додава: „Често можеме да паднеме во рутина и да ги јадеме истите работи одново и одново. Со додавање на разновидно свежо овошје и зеленчук во нашата исхрана, можеме да извлечеме придобивки во однос на содржината на вода, како и витамини и минерали“.
„Диетата со разновидна здрава храна ќе направи голема разлика во третманот на мигрена и целокупното здравје, а исто така може да ја подобри нерамнотежата што придонесува за главоболки“, вели д-р Браун.
Ако барате начини да ја промените исхраната за да ги намалите симптомите на главоболка, јадете повеќе од следниве намирници.
Банани
Ако почувствувате дека започнува нападот на мигрена, наместо преработена храна како слатки, подобра идеја е да се свртите кон бананите. Нивната тајна е во тоа што брзо даваат многу енергија, а содржат и големо количество магнезиум, кој поволно делува на луѓето кои страдаат од главоболки. Освен тоа, дури 74 отсто од бананата е вода, па ова овошје е одлично и за хидратација на организмот.
Семиња
Со оглед на тоа дека недостатокот на магнезиум е една од најчестите нутритивни причинители за главоболки, задолжителна е суплементација на овој минерал, а во големи количини може да се најде во семките од чиа, семките од тиква и ленот.
Билни чаеви
Покрај тоа што чајот хидрира, ако внимателно ја изберете билката, можете да ги ублажите симптомите на мигрена. На пример, нането е познато по тоа што го ублажува притисокот во пределот на синусите, што е чест симптом на синусна главоболка, а чајот од нане ќе помогне и кога се вдишува и кога се пие.
Чоколадо
Ако ве боли главоболка затоа што го намалувате или целосно го прекинувате кафето, јадете повеќе чоколадо. Покрај тоа, темното чоколадо е богат извор на магнезиум.
Печурки
Во некои случаи, главоболките се јавуваат поради слаба апсорпција во цревата, што може да биде помогнато од витаминот Б2. Најмногу го има во печурките, потоа некои видови овошје и јајца, а особено е делотворен за спречување на мигрена.
Овошје од бобинки
„Јадењето храна богата со антиоксиданси може да помогне да се намали притисокот во синусите со текот на времето“, вели д-р Браун. Боровинки, јагоди, капини и малини се добар избор. Помалите плодови имаат тенденција да бидат повеќе изложени на пестициди, па д-р Браун препорачува да се добиваат органски бобинки секогаш кога е можно.
Јогурт
Многу луѓе со мигрена имаат гастроинтестинални проблеми, вклучително и запек. „Дехидрацијата може да придонесе за главоболки и запек“, вели д-р Браун. Обичниот јогурт е пробиотска храна која може да ги реши двата проблема со тоа што го подобрува здравјето на цревата и го хидрира телото.
Спанаќ, блитва и друг лиснат зеленчук
„Тие се одлични извори на магнезиум, кој во некои случаи може да ја намали или дури и спречи мигрената“, вели Браун. Неколку студии покажаа дека многу луѓе со мигрена имаат ниски нивоа на магнезиум во мозокот, поради што многу луѓе со оваа состојба земаат додатоци на овој минерал. Меѓутоа, храната како спанаќот, блитвата и другите лиснати зеленчуци се исто така богати со магнезиум, па затоа би било препорачливо да ги консумирате што почесто доколку страдате од главоболки.
