Либанскиот Хезболах соопшти дека минатата ноќ истрелал проектили врз армиски позиции во северен Израел, откако ја презеде одговорноста за нападот врз израелските војници распоредени во јужен Либан. Од друга страна, израелската армија повика на евакуација на населението во неколку области јужно од Бејрут каде што планира нови напади.
Проиранското движење изјави дека „волеј од проектили биле насочени кон израелските непријателски сили во Саса“.
Како што се додава, нападот се случил во средата во 23:50 часот по локално време.
Денеска израелската армија повика на евакуација на населението во неколку области јужно од Бејрут, каде што планира нови напади.
„Вие сте во близина на инсталации и интереси на Хезболах, против кои израелската војска ќе спроведува операции во блиска иднина“, изјави воен портпарол за мрежата X.
Жителите на областите јужно од Бејрут се повикани веднаш да се евакуираат.
Израелската војска во средата соопшти дека шест израелски војници загинале во нападите на Хезболах, кој ја презеде одговорноста за нападите, додека најмалку осум лица загинаа во нападите во Либан.
