Хамас денеска објави видео на кое се гледаат тројца израелски заложници кои се држат во Газа како молат нивната влада да ја прекине офанзивата против палестинската исламистичка група и да обезбеди нивно ослободување, додека двете страни одбележуваат 100 дена од војната.
Видеото од 37 секунди завршува со зборовите: „Утре ќе ве информираме за нивната судбина“.
Хамас претходно денеска соопшти дека изгубил контакт со некои од заложниците како резултат на израелското гранатирање на Газа, што веројатно ги убило. Портпаролот на вооруженото крило на Хамас, Абу Убаид, во неделата изјави дека судбината на многу од израелските заложници е непозната.
Во своето прво телевизиско интервју по неколку недели, по повод 100-тиот ден од почетокот на војната, Абу Убаид рече дека е можно многу од заложниците да биле убиени во нападите, обвинувајќи го Израел за нивната судбина.
Тој додаде дека „секои преговори се бескорисни пред Израел да ја прекине својата агресија“.
– Упадот преку границата на 7 октомври се случи како одговор на 100-годишниот масакр на нашиот народ од страна на окупаторот и неговите банди – изјави Абу Убаид.
Во нападот на Хамас на 7 октомври загинаа повеќе од 1.200 луѓе, што е најголема еднодневна загуба на животи од основањето на државата Израел во 1948 година. Напаѓачите зедоа и 240 израелски залжници и ги однесоа во Газа.
Абу Убаида рече дека борците од вооруженото крило на Хамас нападнале и онеспособиле околу 1.000 израелски тенкови за време на војната. Зборувајќи за можноста за проширување на нападите, Абу Убаида тврди дека „неколку партии на отпорот објавија дека ќе ги прошират своите напади врз израелскиот непријател во наредните денови“.
