Гувернерот на Флорида побара од американскиот претседател Џозеф Бајден да му дозволи на српскиот тенисер Новак Ѓоковиќ да учествува на Мастерсот во Индијан Велс и Мајами, и покрај тоа што не бил вакциниран против коронавирусот.
Ѓоковиќ поднел барање за специјална дозвола да игра во Индијан Велс и Мајами, но сенаторот од Флорида Рик Скот изјави дека властите го одбиле барањето на светскиот тенисер број еден.
Сепак, гувернерот на Флорида, Рон Де Сантис, побара од администрацијата на Бајден да му дозволи на Ѓоковиќ да се натпреварува на Мастерсот, опишувајќи го негирањето како „нефер, ненаучно и неприфатливо“.
„Ве повикувам да ја преиспитате одлуката. Време е да се остави настрана политиката за пандемијата и да им се даде на Американците тоа што го сакаат – нека си игра“, рече Де Сантис во писмото до Бајден.
На невакцинираните странски државјани во моментов им е забранет влезот во САД, а тоа правило се очекува да биде укината на 11 мај.
Ѓоковиќ го пропушти минатогодишниот Австралија опен откако беше депортиран од Мелбурн затоа што не бил вакциниран. Тој тогаш рече дека повеќе би сакал да ги пропушти Грен слем турнирите отколку да се вакцинира.
Во јануари со триумфот во Мелбурн ја освои 22. Грен слем титула и го израмни рекордот на Шпанецот Рафаел Надал.
Ѓоковиќ нема играно во Индијан Велс и Мајами од 2019 година.
Директорот на турнирот во Индијан Велс, Томи Хас, Тениската асоцијација на САД и организаторите на УС Опен сакаат да се натпреварува тенисерот број еден во светот.
„Единственото нешто што го спречува г-дин Ѓоковиќ да учествува е тоа што вашата администрација продолжува да спроведува погрешни, ненаучни и застарени барања за вакцинација против коронавирус за странски гости“, додаде Де Сантис.
Турнирот во Индијан Велс започнува денеска и ќе трае до 19 март. Потоа следува Мастерсот во Мајами.
