Дванаесет лица загинаа во ски-центарот Гудаури во северна Грузија поради сомневање за труење со јаглерод моноксид, соопшти полицијата. Меѓу жртвите има и 11 странци и еден грузиски државјанин.
Според полицијата, телата на дванаесетте биле пронајдени во саботата во просторот за спиење над ресторанот во Гудаури, најголемиот и највисокиот ски-центар во Грузија, кој е популарна туристичка дестинација за љубителите на скијање и сноуборд.
Телата се откриени на вториот кат од зградата, во која се наоѓа ресторан со индиска храна, пренесува француската новинска агенција АФП. Властите отворија истрага за инцидентот, но не го соопштија идентитетот на жртвите.
Полицијата соопшти дека „прелиминарните анализи не покажуваат траги на насилство врз телата“ и дека се работи за несреќен случај. Откако во петокот зградата остана без струја, го вклучиле агрегатот, објаснуваат оттаму.
