Министерката за здравство Даница Грујичиќ порача дека медиумите треба повеќе да пишуваат за позитивни работи, а црната хроника, особено по двете масовни убиства што се случија во Србија, „доаѓа на последните страни, каде што и е местото“.
„Таа нема место на насловните страници. Премногу се свртевме кон тие негативни примери и самите правиме херои од нив“, изјави Грујичиќ за телевизијата Хепи.
Таа оцени дека огромната одговорност во овој момент е токму на медиумите.
„Мое лично убедување е дека доколку вие како медиум не најдете решение да зборувате за вистински, позитивни работи, се плашам дека овие деца ќе продолжат да бидат збунети. Треба да се вратат на некој нормален колосек“, изјави Грујичиќ.
Според неа, секој е одговорен за состојбата на општеството и за однесувањето на децата.
„За жал, се чини дека ваквиот начин на невоспитано однесување стана шаблон и за тоа сите сме одговорни. Ниту (поранешниот министер за образование Бранко) Ружиќ, ниту (министерот за внатрешни работи Братислав) Гашиќ, ниту јас, ниту некој член на Владата на Србија не сме одговорни за тоа, сите ние сме одговорни за тоа“, рече Грујичиќ.
Министерот апелираше до родителите да бараат решенија за сите проблеми преку разговор со своите деца, оценувајќи дека семејството е растурено и дека родителите се помалку време поминуваат со своите деца.
