Грчката полиција има видео-снимка од возилото што го користеле напаѓачите при егзекуцијата на македонскиот државјанин Орхан Бајрами-Оки на Халкидики, а сослушува и две жени, очевидци на убиството, кои биле во придружба на убиенот и неговиот ранет пријател – пишуваат грчки медиуми, повикувајќи се на извори блиски на истрагата.
Според ЕРТ безбедносните камери снимиле патнички автомобил со странски регистарски таблички пред и по убиствениот напад, во близина на вилата во која престојувал сега убиениот Оки. Првично имаше информации дека двајцата сторители се движеле со мотор.
Според полициски извори, возилото што го користеле извршителите на убиството не ги поминало границите на државата
– Возилото не поминало низ ниту еден граничен премин, па се вршат опсежни претреси за негово лоцирање во Грција – велат истите полициски извори.
Сепак, сторителите можеби го оставиле возилото во Грција, додека тие ја преминале границата користејќи други начини.
Според последните информации, двајцата сторители откако излегле од автомобилот, го прескокнале ѕидот, стасале пред големиот стаклен прозорец и со пиштол калибар 32 милиметри од надвор пукале кон лицата во куќата. Испукале 19 пати.
39-годишниот Орхан Бајрами бил смртно ранет од истрелите, а неговиот 45-годишен пријател Сеад Слезовиќ бил тешко повреден и е хоспитализиран.
Двете жени биле очевидци на убиството. Токму тие повикале помош на 112, а потоа заедно со третото лице ги однеле двајцата застрелани во Здравствениот дом Касандра.
Кога пристигнале првите полицајци, жртвите веќе биле пренесени во Здравствениот дом.
Грчката полиција ја поврзува мафијашката егзекуција на 39-годишниот Орхан Бајрами-Оки со уште едно убиство пред околу три месеци во локалот Шиша-Бар во Скопје. Неговиот близок пријател, кој наводно припаѓал на конкурентска група на групата на Оки, тогаш бил егзекутиран во кафуле со речиси 40 куршуми.
Во истиот контекст се испитува дали денешното убиство е поврзано и со уште еден убиствен напад што се случи во Приштина на Косово, при што жртвата била исто така блиска до 39-годишниот Оки.
Полициските извори велат дека со месеци во Скопје се води војна меѓу криминалните групи на подземјето, при што групата на Оки е цел на ривалска мафијашка група.
Всушност, како што тврдат полициски извори, 39-годишниот Бајрами, всушност, се криел во Грција знаејќи дека тој е следната цел.
