По два дена борба, Новак Ѓоковиќ успеа да го победи Хуберт Хуркач. Започна во неделата навечер, а заврши во понеделник попладне. Можеби сè ќе беше поинаку доколку организаторите на турнирот не правеа проблем со почетокот на програмата – натпреварите сега почнуваат во 13:30 часот по локално време и тоа е нешто што сите ги фрустрира, пишува Мондо.
Многумина бараа тоа да се смени, да се одложи почетокот на мечот на Централниот терен за најмалку еден час, но залудно. Поради сето ова има проблеми со одложување на натпреварите, бидејќи правилата се такви што сè мора да се заврши до полноќ по наше време, односно до 23 часот по локално време во Вимблдон.
– Верувам дека Вимблдон мора да го промени тоа правило, знам дека е тешко да се помести полицискиот час (полноќниот удар), но натпреварите можат да започнат најмалку во 12 часот – рече Новак на прес-конференцијата.
Планот беше мечот меѓу српскиот и полскиот тенисер да започне околу 17 часот, но поради мечот на бразилската тенисерка во сингл, тој беше одложен.
– Мислев дека имам барем час и половина пауза, па ми се јавија по 20 минути. Едноставно, треба да си подготвен за секое сценарио, тоа се работите што може само да ги предвидиш. Пред тоа размислував дали да одам до мојата соба, до куќата во близина. Останав во комплексот во недела и чекав седум часа да почне мечот, тоа е премногу. Не можеш ништо да предвидиш, штом го видов распоредот за недела знаев може да има долги натпревари пред мојот. Внатре има сè за играчите кои се таму со тимовите, со опремата, но не е лесно да најдете агол за себе. Знам дека Вимблдон ја почитува традицијата и тоа е нешто што јас го почитувам, но мислам дека има работи што треба да се променат.
Ѓоковиќ зборуваше и за тревата на која играа со Полјакот.
– Тревата е најчувствителната подлога во нашиот спорт. Една од промените што ја направија организаторите е што дозволија тренирање на Централниот терен пред почетокот на турнирот, а тоа не ми се допаѓа, пред сè поради подлогата. Реков, има некои проблеми таму и би сакал тоа да се избегнува во иднина.
