Годишно во светот се произведуваат 460 милиони тони пластика, а тој број е двојно зголемен во последните десет години и не покажува тренд на опаѓање, пренесува Франс 24 податоци од Организацијата за економска соработка и развој (ОЕЦД), по повод Светски ден на животната средина на ОН.
Од 2000 до 2019 година, тој број се зголеми за повеќе од двојно и нема знаци за пад на производството, па ако не се преземат мерки, глобалното производство ќе се зголеми речиси тројно до 2060 година, достигнувајќи 1.231 милиони тони пластика.
Според ОЕЦД, пет години е максимален животен век на речиси две третини од пластиката што се произведува секоја година. Претежно се користи за пакување храна (31 отсто), текстил и стоки за широка потрошувачка (20 отсто), оваа пластика често завршува како отпад по една или само неколку употреби.
Бројот на произведени тони пластичен отпад во светот во 2019 година изнесува 353 милиони. Уделот на отпадот драматично варира во различни земји и групи: 21 отсто доаѓа од САД, а 28 отсто доаѓа од други земји на ОЕЦД, додека 19 отсто доаѓа од Кина и 5 отсто од Индија. Останатите 27 проценти доаѓаат од остатокот од светот.
Просечното количество пластичен отпад произведен по лице годишно во Европа е 35 килограми, според Евростат. Таа бројка одговара на приближно 1000 шишиња со капацитет од 500 ml. Севкупно, во ЕУ годишно се произведуваат околу 30 милиони тони пластичен отпад.
Девет проценти е процентот на пластичен отпад рециклиран на глобално ниво во 2019 година, според ОЕЦД. Половина од преостанатиот пластичен отпад оди на депониите, 19 отсто се согорува, а 22 отсто се отстранува во природа или согорува на отворено. Вкупно 22 милиони пластични предмети секоја година завршуваат во природа.
Пластиката придонела 3,4 отсто во глобалните емисии на стакленички гасови во 2019 година, според ОЕЦД. Освен што создава загадување, пластиката значително придонесува за климатските промени. Повеќето од овие емисии доаѓаат од производството и преработката на фосилни горива, бидејќи повеќе од 99 проценти од пластиката е добиена од нафта, гас и јаглен. Ако нивната употреба продолжи да се зголемува, како што е предвидено, емисиите поврзани со пластиката ќе сочинуваат 15 отсто од вкупните глобални емисии на јаглерод до 2050 година, според проценките на Хјуман рајтс воч.
Се проценува дека меѓу 400.000 и милион луѓе во земјите во развој годишно умираат од болести поврзани со лошо управување со отпадот, особено од отровните испарувања што се ослободуваат од согорувањето на пластичен отпад, се вели во студијата на британската агенција Tearfund.
Во водната средина, 139 милиони тони пластичен отпад се акумулирале помеѓу 1970 и 2019 година, според ОЕЦД, од кои 109 милиони тони во реките и езерата и 30 милиони тони во океаните. Се проценува дека секоја минута пластика еднаква на волуменот на камион за ѓубре завршува во океанот.
Како резултат на голтање или заплеткување во пластика, годишно умираат 100.000 морски цицачи, според различни студии. Покрај мрежите и пластичните кеси, океанот преполни со микропластика – ситни парчиња со дијаметар помал од 5 мм, кои се резултат на распаѓање на кеси, шишиња, гуми, догорчиња од цигари, влакна од облека и друго.
Сините китови внесуваат 10 милиони парчиња микропластика дневно, според студијата објавена во списанието Nature во 2022 година.
Луѓето голтаат пет грама пластика секоја недела, што е еквивалент на кредитна картичка, според австралиската студија објавена во 2019 година.
