Годишната стапка на инфлација во Турција во февруари се искачи на 67,07%, објави денеска турскиот институт за статистика Туркстат. Инфлацијата во Турција е највисока во последните 15 месеци.
Највисок годишен раст на цените е забележан во комбинираниот сектор хотели, кафулиња и ресторани од 94,78%, потоа образование со 91,84%, додека стапката за здравство е 81,25% и транспорт 77,98%, покажуваат податоците на Заводот за статистика.
Потрошувачките цени на храната и безалкохолните пијалаци во февруари скокнаа за 71,12% во однос на истиот период од претходната година и забележаа изненадувачки голем месечен раст од 8,25%.
Годишната базна стапка на инфлација во Турција исто така забрза во февруари, од 70,48 отсто во јануари на 72,89 отсто.
На 22 февруари Централната банка на Турција (TCMB) одлучи да ја задржи референтната каматна стапка на 45%. Претходно, почнувајќи од јуни 2023 година, банката 8 пати ја зголеми референтната каматна стапка за вкупно 3.650 базични поени.
Централната банка на Турција објави дека референтната каматна стапка ќе остане на сегашното ниво додека не дојде до значителен и одржлив пад на основниот месечен тренд на инфлација.
