Германскиот канцелар пристигна со воз во Киев за да се сретне со украинскиот претседател. Канцеларот Олаф Шолц вторпат патува со воз до главниот украински град. По пристигнувањето тој најави помош од 650 милиони евра нагласувајќи дека Германија ќе остане најсилниот поддржувач на Украина во Европа.
– Повеќе од 1.000 дена Украина херојски се брани од безмилосната руска агресорска војна – изјави Шолц.
„Дојче Веле“ пишува дека освен за помошта, Шолц и украинскиот лидер Володимир Зеленски ќе зборуваат за можните дипломатски иницијативи за крај на војната под водство на новоизбраниот американски претседател Доналд Трамп.
Шолц неколкупати разговараше со Зеленски и американскиот претседател Џо Бајден, а на оваа тема разговараше и со Доналд Трамп.
Германскиот канцелар доаѓа во време кога Украина има загуби на фронтот, борејќи се да го задржи регионот Курск и да ги одбие Русите на истокот од земјата.
Шолц последен пат ја посети Украина во јуни 2022 година, заедно со францускиот претседател Емануел Макрон и тогашниот италијански премиер Марио Драги.
