Српскиот претседател Александар Вучиќ во интервју за весникот „Ханделсблат“ (Handelsblatt) изјави дека Србија планира да ја обезбеди германската автомобилска индустрија со литиум, што ќе ја прекине зависноста на Европа од увоз на реткиот метал.
– Ова партнерство е од многу големо стратешко значење за двете земји. Германија ќе биде единствената земја што директно ќе добие литиум. На овој начин Србија се позиционира како столб на германската автомобилска индустрија, на која ѝ е потребен материјалот за производство на батерии за електрични возила. Досега Европа беше зависна од увоз од Кина, Австралија и од Јужна Америка. Сакаме да ставиме крај на ова – посочи Вучиќ.
Србија и Европска Унија на 19 јули годинава потпишаа меморандум за разбирање, вклучувајќи стратешко партнерство во областа на одржливи суровини, синџири за производство на батерии и електрични возила. Документот беше потпишан во Белград во присуство на српскиот претседател Александар Вучиќ и германскиот канцелар Олаф Шолц.
Според Вучиќ, Србија може да произведува 58.000 тони литиум годишно и да ја снабдува ЕУ, што би било доволно за производство на 1,1 милион електрични возила.
Во 2022 година српските власти го прекинаа заедничкиот проект со австралиско-британскиот концерн „Рио Тинто“ за развој на наоѓалишта на литиум по серијата протести на еко-активистите. Во јули годинава Уставниот суд на Србија ја укина владината одлука, со која се овозможи продолжување на проектот.
