Од 1 август Германија целосно ќе престане да купува јаглен од Русија, а од 31 декември руска нафта, изјави Јерг Кукиес, економски помошник на германскиот канцелар Олаф Шолц.
„Секој кој е запознаен со историјата на гасоводот Дружба, кој веќе беше инструмент на советската империја во Источна Европа, знае дека ослободувањето од оваа зависност не е тривијална работа, но токму тоа ќе го постигнеме за неколку месеци“, рече тој на форумот Сиднеј енерџи, пренесува ТАСС.
Според него, клучна и многу тешка задача за Германија во иднина ќе биде изнаоѓање решение за да престане да купува гас од Русија.
Кукиес истакна дека тоа е причината зошто Германија брзо развива терминали за прием на течен природен гас (LNG).
Тој призна дека САД и Катар можат да и достават на Европа околу 30 милијарди кубни метри гас во форма на ЛНГ, што сè уште не е доволно да го замени рускиот гас.
Сиднеј е домаќин на Меѓународниот енергетски форум од 12-13 јули, организиран од австралиската влада и Меѓународната агенција за енергија.
На него присуствуваат министрите за енергетика на Австралија, САД, Јапонија, Индонезија, Самоа и Индија, како и лидери на големи компании кои поддржуваат и развиваат зелени технологии и претставници на бизнис заедницата.
