Германија минатата година изгубила 100 милијарди евра како резултат на руската воена операција во Украина, изјави претседателот на германскиот институт за економски истражувања Марсел Фрачер.
Според Фрачер, конфликтот во Украина и поврзаното зголемување на трошоците за електрична енергија, ја чинеа Германија речиси 2,5 отсто од продуктивноста на економијата минатата година, што е еднакво на 100 милијарди евра.
– Овие трошоци ќе продолжат да растат во наредните години – рече Фрачер.
Тој додаде дека Германија е особено погодена од кризата „бидејќи е зависна од руските енергетски извори, а исто така има висок удел во енергетско интензивната индустрија и е исклучително зависна од извозот и глобалните синџири на снабдување“.
Претходно европскиот комесар за економски прашања Паоло Џентилони изјави дека Германија е една од земјите на ЕУ најмногу погодени од кризата.
Тој посочи дека врвот на инфлацијата помина, а различните барометри на расположението, внатрешни и надворешни, се во добра состојба.
Како што истакна, пред шест месеци се зборуваше за прекини на струја, длабока рецесија и стагфлација.
