Германска бригада од околу 4.800 војници стационирани долж литванско-руската граница ќе биде подготвена за борба во 2027 година, соопштија министрите за одбрана.
Договорот меѓу Германија и Литванија ќе го означи првото постојано распоредување на германски војници по Втората светска војна.
Германскиот министер за одбрана Борис Писториус го спореди „историскиот“ договор со стационирањето на сојузничките сили во Западна Германија, кои беа распоредени да ја бранат Западна Европа во случај на советски напад за време на Студената војна.
„Источното крило сега се пресели на исток и должност на Германија е да го заштити“, рече Писториус.
Повеќето од единиците ќе пристигнат во 2025 и 2026 година, а на нив и на нивните семејства ќе им бидат понудени „атрактивни услови“, вклучувајќи училишта на германски јазик, сместување и летови, рече тој.
„Брзината на реализација на проектот јасно покажува дека Германија ја разбра новата безбедносна реалност“, додаде германскиот министер за одбрана.
Германија веќе ја предводи мултинационалната борбена група на НАТО во Литванија со околу 1.000 војници, кои ќе бидат интегрирани во бригадата.
По руската инвазија на Украина во февруари 2022 година, НАТО вети дека ќе го зајакне своето присуство на источната граница на алијансата.
Потезите на НАТО следуваат по анализата објавена претходно од американски тинк-тенк, во која се предупредува дека Владимир Путин ја подготвува Русија за „потенцијална конвенционална војна од големи размери против НАТО“.
