Германија, Ирска и Италија ќе бидат најпогодени од зголемувањето на царинската стапка за 10% на САД, најавена од новоизбраниот претседател Доналд Трамп. Но, новата царинска политика на САД ќе засегне и голем број други европски земји.
Euronews, анализирајќи ги податоците на Евростат, посочува дека три земји се најголеми извозници во САД, но една од нив е најзависна од тој извоз бидејќи половина од нејзиниот извоз се реализира во САД.
Анализата покажува дека Германија во 2023 година оствари најголем приход од извозот во САД извезувајќи стоки во вредност од 157,7 милијарди евра. По неа следуваат Италија и Ирска со извоз вреден 67,3 милијарди евра, односно 51,6 милијарди евра. Заедно, овие три земји сочинуваат 55% од извозот на ЕУ во САД.
Франција извезе 43,9 милијарди евра, Холандија 40,5 милијарди евра, Белгија 31,3 милијарди евра, а Шпанија 18,9 милијарди евра.
Анализата на уделот на САД во извозот надвор од ЕУ и уделот на САД во вкупниот извоз на стоки за секоја земја од ЕУ открива потенцијални ризици за секоја земја, дури и за оние со помал вкупен извоз.
Во 2023 година, Ирска имаше најголем удел во извозот во САД меѓу земјите на ЕУ, при што 45,8% од извозот надвор од ЕУ оди во САД. Тоа значи дека речиси половина од ирскиот извоз надвор од ЕУ бил наменет за Америка.
Дополнително, 7 други земји од ЕУ имаа учество од 20 или повеќе проценти, што се движеше од 20 до 26%. Меѓу овие земји се Финска, Австрија, Португалија, Италија, Германија, Словачка и Шведска.
Меѓу четирите најголеми економии во ЕУ, Шпанија имаше најмал удел во извозот во САД во извозот „вон ЕУ“ со 13%, а потоа следи Франција со 16%. Овој процент беше помал од 10 во седум земји на ЕУ. Тоа се Словенија, Кипар, Бугарија, Латвија, Хрватска, Романија и Грција.
Податоците на Евростат покажуваат дека убедливо најзависна земја на ЕУ од извозот во САД е Ирска. Во 2023 година, повеќе од една четвртина (26,6%) од целиот извоз на Ирска беше насочена кон САД. Следат Финска, Италија и Германија, со 11,1, 10,7 и 9,9% од нивниот вкупен извоз на стоки во САД.
Меѓу четирите најголеми економии на ЕУ, францускиот извоз во САД учествува со 7,3%, додека шпанскиот извоз со 4,8%.
САД, исто така, имаа значителен удел во нордискиот извоз. Покрај Финска (11,1%), која го зазеде второто место, Шведска (8,9%) и Данска (8,3%) го зазедоа петтото и шестото место меѓу земјите на ЕУ во однос на уделот на извозот во САД.
Овој удел е повеќе од 5% и во другите земји на ЕУ, вклучувајќи ги Австрија (7,1%), Португалија (6,8%) и Белгија (6,3%).
Вкупно, уделот на САД во извозот надмина 5% во 10 земји од ЕУ.
Така, потенцијалната царина од 10% за сите стоки од ЕУ извезени во САД би имало значително влијание не само врз Ирска, Германија и Италија, туку и врз голем број други земји.
Меѓу главните европски земји надвор од ЕУ, САД имаат значителен дел од извозот на стоки на Велика Британија. Според Канцеларијата за национална статистика на Велика Британија, САД учествуваа со 15,6% од извозот на ОК во 2023 година, во вкупна вредност од околу 74 милијарди евра.
