Претседателот на Собранието Африм Гаши на денешниот брифинг со новинарите истакна дека ќе се консултираат со Уставниот суд за да не згрешат, по изјавите од некои правни експерти кои сметаат дека е противуставно и противзаконски парламентот да ги разрешува членовите на Судскиот совет кои се избрани од пратениците.
Според Гаши, не е исклучена можноста по празниците да почне постапката за разрешување на 5 члена на Судскиот совет, кои се избрани во Собранието, од редовите на истакнатите правници.
– Негативниот извештај за работата на Судскиот совет значи дека Собранието на некој начин ги отповикува и дека може да почне процедурата за нивно разрешување и за назначување нови. Процедурата е одредена во Деловникот. Комисијата за избори и именувања како што ги назначила, на ист начин ќе ги разреши. Така ќе оди и назначувањето на новите членови на Судскиот совет. Од Комисијата за избори и именувања ќе зависи кога ќе почне процедурата, на дневен ред ќе биде штом ќе има услови за тоа прашање – рече Гаши.
Судскиот совет има вкупно 15 члена. Освен правниците, членуваат 8 судии кои се избираат на непосредни судски избори, а членови по функција се министерот за правда и претседателот на Врховниот суд.
Од петмината правници, тројца ги избира директно Собранието, а останатите двајца ги предлага претседателот на државата, а ги избира Собранието.
