Галичник три недели е отсечен од светот поради непрооден пат и нема струја. Од месната заедница преку социјалните мрежи побараа надлежните да го расчистат патот и да обезбедат струја за селото.
– Бараме да ни овозможи проодност до Галичник, кој веќе трета недела е отсечен од патна комуникација. Сакаме да укажеме дека според активните сообраќајни законски норми станува збор за регионален пат, кој мора да биде постојано прооден- велат од месната заедница на селото.
Оттаму додаваат дека во ова мијачко село трета недела не функционира уличното осветлување, а од денеска поради дефект на 20 киловолтен далновод нема ниту електрична енергија.
„ Сакаме да ја потсетиме јавноста дека во Галичник има постојани жители, а многумина луѓе сопственици на имот имаат редовни работни обврски поврзани со повремено присуство во Галичник, на кои им е потребен пристап“, се наведува во соопштението пренесено преку социјалните мрежи.
Од месната заедница очекуваат соодветна и навремена реакција на надлежните институции и нормализирање на состојбата.
